CID අත්අඩංගුවේ පසුවන සුරේෂ් සලේ මරණාන්තික උපවාසයක: සෞඛ්ය තත්ත්වය බරපතල බවට පවුලේ අයගෙන් ලිපියක්
LakNews99 ) -
රාජ්ය බුද්ධි සේවයේ (SIS) හිටපු ප්රධානී, විශ්රාමික මේජර් ජෙනරාල් සුරේෂ් සලේ මහතා අපරාධ පරීක්ෂණ දෙපාර්තමේන්තු (CID) අත්අඩංගුවේ පසුවෙමින් මරණාන්තික උපවාසයක් ආරම්භ කර ඇති බව වාර්තා වේ. තමන්ට එල්ල වන දැඩි මානසික පීඩනය සහ අසාධාරණ සැලකීම්වලට විරෝධය පළ කරමින් ඔහු මෙම පියවර ගෙන ඇති බව ඔහුගේ බිරිඳ වන මනෝරි සලේ මහත්මිය පොලිස්පතිවරයා වෙත ලිපියක් යොමු කරමින් දැනුම් දී තිබේ.
කොළඹ කොටුව මහේස්ත්රාත් අධිකරණය හමුවේ කරුණු දැක්වූ සුරේෂ් සලේ මහතාගේ නීතිඥවරුන් පෙන්වා දුන්නේ, ඔහුව අඩි 6x4 ප්රමාණයේ අතිශය කුඩා කාමරයක රඳවා තබා ඇති බවයි. එහි පවතින දැඩි අපහසුතා හේතුවෙන් ඔහු දැඩි මානසික කාංසාවකින් පෙළෙන බවත්, වෛද්ය වාර්තාවලට අනුව ඔහු සියදිවි නසාගැනීමේ ප්රවණතාවයකට (Suicidal tendency) පත්වීමේ බරපතල අවදානමක් පවතින බවත් නීතිඥවරු අධිකරණයට ප්රකාශ කළහ. මේ හේතුවෙන් ඔහුව වහාම රෝහල් ගත කරන ලෙස පවුලේ සාමාජිකයෝ ඉල්ලා සිටිති.
වසර 37කට අධික කාලයක් රාජ්ය සේවයේ නිරත වූ නිලධාරියෙකු වන සලේ මහතාව අනෙකුත් රැඳවියන් ඉදිරිපිට ඇඳුම් ගලවා පරීක්ෂා කිරීම වැනි අවමන් සහගත තත්ත්වයන්ට ලක් කර ඇති බවට ඔහුගේ පාර්ශ්වයෙන් චෝදනා එල්ල වේ. කෙසේ වෙතත්, ශ්රී ලංකා පොලිසිය නිල නිවේදනයක් නිකුත් කරමින් එම චෝදනා සම්පූර්ණයෙන්ම ප්රතික්ෂේප කර ඇත. සාමාන්ය සැකකරුවෙකුට සලකන නීත්යානුකූල රාමුව තුළ පමණක් කටයුතු කරන බවත්, කිසිදු අමානුෂික සැලකීමක් සිදු කර නොමැති බවත් පොලිසිය අවධාරණය කරයි.
මේ අතර, අධිකරණයේදී කරුණු දැක්වූ රජයේ අතිරේක සොලිසිටර් ජනරාල්වරයා ප්රකාශ කළේ, ප්රබල බුද්ධි අංශ ප්රධානියෙකු ලෙස කටයුතු කළ අයෙකු වෛද්ය පරීක්ෂණ හමුවේ මෙලෙස හැසිරීම පුදුම සහගත බවයි. මෙය ඇප ලබාගැනීම වෙනුවෙන් සැලසුම්සහගතව සිදු කරන "රංගනයක්" බවටද රජයේ පාර්ශ්වය චෝදනා කළේය.
2019 පාස්කු ඉරිදා බෝම්බ ප්රහාරය සම්බන්ධ විමර්ශන මත පසුගිය පෙබරවාරි 25 වනදා ත්රස්තවාදය වැළැක්වීමේ පනත (PTA) යටතේ ඔහුව අත්අඩංගුවට ගැනිණි. හිටපු බුද්ධි ප්රධානියාට සලකන ආකාරය පිළිබඳව උදය ගම්මන්පිල සහ නාමල් රාජපක්ෂ වැනි දේශපාලනඥයින් ද සිය කනගාටුව පළ කර ඇත.
තමන්ව අත්අඩංගුවට ගැනීමට එරෙහිව සුරේෂ් සලේ මහතා විසින් ඉදිරිපත් කර ඇති මූලික අයිතිවාසිකම් (FR) පෙත්සම සලකා බැලීම සඳහා ශ්රේෂ්ඨාධිකරණය විසින් ලබන සැප්තැම්බර් 25 වනදා දින නියම කර තිබේ. එසේම ඔහුගේ මානසික සෞඛ්ය වාර්තාව පදනම් කරගත් අධිකරණ නියෝගය ඉදිරි දිනකදී කොටුව මහේස්ත්රාත් අධිකරණය විසින් ප්රකාශයට පත් කිරීමට නියමිතය.