අයිස් සමඟ දැලේ පැටලුණු සැකකරු ලක්ෂ 18ක ත්‍රීරෝද රථ සොරකමකටත් සම්බන්ධ බවට හෙළිවෙයි
රාගම බස් නැවතුම අසලදී 2025.06.08 දින රාගම පොලිසිය මගින් සිදුකළ විශේෂ වැටලීමකදී, අයිස් නමැති මත්ද්‍රව්‍ය සන්තකයේ තබාගෙන සිටි සැකකරුවෙක් අත්අඩංගුවට ගෙන තිබේ. මොහු පිළිබඳව සිදුකළ වැඩිදුර විමර්ශන වලදී, දින හතරකට පෙර රාගම පොලිස් බලප්‍රදේශයේදී සිදුවූ රුපියල් ලක්ෂ 18ක් වටිනා ත්‍රීරෝද රථ සොරකමකට මොහු සම්බන්ධ බවට තොරතුරු අනාවරණය වී ඇත.
මෙලෙස අත්අඩංගුවට ගෙන ඇත්තේ කොළඹ 14 ප්‍රදේශයේ පදිංචි 26 හැවිරිදි අයෙකි. රාගම පොලිස් නිලධාරීන් කණ්ඩායමක් විසින් සිදුකළ මෙම වැටලීමේදී මොහු සන්තකයේ තිබී අයිස් මත්ද්‍රව්‍ය ග්‍රෑම් 09යි මිලිග්‍රෑම් 480ක් සොයාගෙන තිබේ.
අත්අඩංගුවට ගත් සැකකරුගෙන් ප්‍රශ්න කිරීමේදී, 2025.06.04 දින රාගම පොලිස් වසමේදී වාර්තා වූ රුපියල් ලක්ෂ 18ක් වටිනා ත්‍රීරෝද රථ සොරකමට මොහු සම්බන්ධ බවට තොරතුරු හෙළිවී ඇත.
සොරකම් කරන ලද අදාල ත්‍රීරෝද රථය ද මේ වන විට පොලිස් භාරයට ගෙන තිබේ.
සැකකරු අධිකරණයට ඉදිරිපත් කිරීමට නියමිත අතර, රාගම පොලිසිය මේ පිළිබඳව වැඩිදුර විමර්ශන සිදුකරයි. මත්ද්‍රව්‍ය ජාවාරම සහ සොරකම් වැනි අපරාධ අතර ඇති සම්බන්ධය මෙම සිදුවීමෙන් යළිත් තහවුරු වන බව පෙනේ.