වෙන්නප්පුව පොලිස් වසමට අයත් කොළඹ - පුත්තලම ප්‍රධාන මාර්ගයේ කොලින්ජාඩිය ප්‍රදේශයේදී සිදුවූ රිය අනතුරකින් 76 හැවිරිදි පුද්ගලයෙකු ජීවිතක්ෂයට පත්ව තිබේ. අනතුර සිදුව ඇත්තේ 2025 ජූනි 06 වන දින උදෑසන කාලයේදීය.
පොලිස් වාර්තාවලට අනුව, හලාවත දෙස සිට කොළඹ දෙසට ධාවනය වෙමින් තිබූ වෑන් රථයක්, එම දිශාවටම ගමන් කරමින් තිබූ යතුරුපැදියක් පසුකර යාමට උත්සාහ කිරීමේදී යතුරුපැදියේ ගැටී මෙම අනතුර සිදුව ඇත. අනතුරින් බරපතල තුවාල ලැබූ යතුරුපැදිකරු මාරවිල රෝහලට ඇතුළත් කිරීමෙන් පසු මියගොස් ඇත. මියගිය පුද්ගලයා පහළ කටුනේරිය ප්‍රදේශයේ පදිංචි අයෙකි.
මෘත ශරීරය පශ්චාත් මරණ පරීක්ෂණයෙන් පසු ඥාතීන්ට භාර දී ඇති අතර, අනතුරට සම්බන්ධ වෑන් රථයේ රියදුරු අත්අඩංගුවට ගෙන මාරවිල මහේස්ත්‍රාත් අධිකරණයට ඉදිරිපත් කිරීමට නියමිතය. වෙන්නප්පුව පොලිසිය මේ පිළිබඳව වැඩිදුර විමර්ශන සිදුකරයි.