හිටපු අමාත්‍ය කෙහෙළිය රඹුක්වැල්ල මහතාගේ නිවසේ සේවිකාවක් ලෙස සේවය කළ කාන්තාවට, සෞඛ්‍ය අමාත්‍යාංශයේ වංචනික පත්වීම් ලබාදී රාජ්‍ය මුදල් අවභාවිතා කිරීම සම්බන්ධ නඩුවකට අදාළව ඇප ලබා දී තිබේ.
කොළඹ ප්‍රධාන මහේස්ත්‍රාත් තනුජා ලක්මාලි ජයසිංහ මහත්මිය සැකකාරිය රුපියල් මිලියනය බැගින් වූ ශරීර ඇප හතරක් මත නිදහස් කිරීමට නියෝග කළාය.
නිපුනි ක්‍රිෂ්ණජිනී රාජපක්ෂ නැමැති මෙම සැකකාරිය එඹිලිපිටිය ප්‍රදේශයේ පදිංචිකාරියක් වන අතර අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් ජූනි 11, 2025 දින අත්අඩංගුවට ගෙන ඇත.
CIABOC නිවේදනය කරන්නේ මෙම කාන්තාව හිටපු අමාත්‍යවරයාගේ පෞද්ගලික නිවසේ සේවය කර ඇති අතර, ව්‍යාජ සෞඛ්‍ය අමාත්‍යාංශ පත්වීම් ලබාදීමෙන් රජයේ වැටුප් සහ අතිකාල දීමනා අවභාවිතා කිරීම සම්බන්ධ පුළුල් විමර්ශනයකට සම්බන්ධ බවට විශ්වාස කරන බවයි.
අල්ලස් කොමිසම දැනට හිටපු අමාත්‍ය කෙහෙළිය රඹුක්වැල්ල මහතා 2021 සහ 2023 අතර කාලයේ ජනමාධ්‍ය, සෞඛ්‍ය සහ පරිසර අමාත්‍යවරයා ලෙස කටයුතු කරන කාලයේ ඔහුගේ පෞද්ගලික කාර්ය මණ්ඩලයේ සාමාජිකයන් ඇතුළු හිතවතුන් කිහිප දෙනෙකුට ව්‍යාජ අමාත්‍යාංශ පත්වීම් ලබා දීම සම්බන්ධයෙන් විමර්ශනයක් සිදු කරයි. මෙම පුද්ගලයින්ට ගෙවන ලද වැටුප් සහ අතිකාල දීමනා පෞද්ගලික හා දේශපාලන කටයුතු සඳහා යොමු කර ඇති බවට චෝදනා එල්ල වී තිබේ.
මෙම චෝදනා හේතුවෙන් රජයට රුපියල් මිලියන 8 කට වැඩි පාඩුවක් සිදුවී ඇති බව පැවසේ.
හිටපු අමාත්‍ය රඹුක්වැල්ල මහතා, ඔහුගේ පුත්‍රයා සහ ඔහුගේ මහජන සම්බන්ධතා ලේකම්වරයා මෙම විමර්ශනයට නම් කර ඇති අතර ඔවුන් දැනට එකම කාරණය සම්බන්ධයෙන් මීට පෙර රක්ෂිත බන්ධනාගාර ගත කිරීමෙන් පසු ඇප මත නිදහස්ව සිටිති.
සැකකාරිය විසින් පවත්වාගෙන යන ලද බැංකු ගිණුමක් සම්බන්ධයෙන් වැඩිදුර විමර්ශන සිදුකරන බව අල්ලස් කොමිසම අධිකරණයට දැනුම් දුන්නේය. සැකකාරිය ගිණුම දර සදහා විවෘත කළ බව පැවසුවද එවැනි ව්‍යාපාර කටයුතු කිසිවක් එම ගිණුම හරහා සිදුකර නොමැති බව විමර්ශනවලින් හෙළි වී තිබේ.
සැකකාරිය වෙනුවෙන් පෙනී සිටි නීතිඥවරයා අධිකරණයට පැවසුවේ එම ගිණුමේ ඇති මුදල් නඩුවේ තුන්වන සැකකරු වන නිශාන්ත බස්නායක නම් තෙවන පාර්ශවයකට අයත් බවයි. ඔහු තවදුරටත් කියා සිටියේ ප්‍රශ්නගත අරමුදල් රජයට අයත් නොවන බවයි.