දිවයින පුරා ත්රීරෝද රථ සොරකම් කළ මහා පරිමාණ ජාවාරමක් කොටු වෙයි: සැකකරුවන් 3ක් සමඟ ත්රීරෝද රථ 11ක් පොලිස් භාරයට
දිවයිනේ විවිධ ප්රදේශවලින් ත්රීරෝද රථ සොරකම් කර, ඒවායේ අනන්යතාව වෙනස් කර අලෙවි කිරීමේ නිරත වූ සංවිධානාත්මක කණ්ඩායමක් නීතියේ රැහැනට හසුකර ගැනීමට නුගේගොඩ කොට්ඨාස අපරාධ විමර්ශන අංශය සමත්ව තිබේ.
මෙම විශේෂ මෙහෙයුම ආරම්භ වී ඇත්තේ මිරිහාන පොලිස් ස්ථානයට වාර්තා වූ එක් ත්රීරෝද රථ සොරකමක් සම්බන්ධයෙන් සිදුකළ දීර්ඝ විමර්ශනයක ප්රතිඵලයක් වශයෙනි. එහිදී මුලින්ම සැකකරුවන් දෙදෙනෙකු අත්අඩංගුවට ගත් පොලිස් නිලධාරීන්, ඔවුන්ගෙන් ලද තොරතුරු මත ජාවාරමට සම්බන්ධ තෙවැනි සැකකරු ද අත්අඩංගුවට ගෙන ඇත.
පොලිස් ප්රශ්න කිරීම් හමුවේ අනාවරණය වූ තොරතුරු මත, කුරුවිට ප්රදේශයේ සඟවා තිබූ එක් ත්රීරෝද රථයක් මුලින්ම සොයා ගැනුණි. පසුව සිදුකළ වැඩිදුර පරීක්ෂණවලදී යටියන්තොට, බලංගොඩ, බදුල්ල සහ බත්තරමුල්ල යන ප්රදේශවල සඟවා තිබූ තවත් ත්රීරෝද රථ 10ක් සොයා ගැනීමට පොලීසියට හැකි වී තිබේ.
මෙම ජාවාරම්කරුවන් ඉතා සූක්ෂ්ම ලෙස සොරකම් කරන ලද රථවල වර්ණය වෙනස් කර, චැසි අංක සහ එන්ජින් අංක කූඨ ලෙස සකස් කර ඇති බව විමර්ශනවලදී හෙළි විය. එමෙන්ම ව්යාජ අංක තහඩු සහ ව්යාජ ලියකියවිලි සකස් කරමින් මෙම රථ අහිංසක පාරිභෝගිකයන්ට අලෙවි කිරීමට ඔවුන් සැලසුම් කර තිබූ බව ද පොලීසිය පවසයි.
අත්අඩංගුවට පත්ව ඇති සැකකරුවන් කැලණිය, අම්බලන්තොට සහ පරකඩුව යන ප්රදේශවල පදිංචිකරුවන් වේ. සිද්ධිය සම්බන්ධයෙන් නුගේගොඩ කොට්ඨාස අපරාධ විමර්ශන අංශය වැඩිදුර විමර්ශන පවත්වන අතර, සොරාගන්නා ලද තවත් වාහන තිබේද යන්න පිළිබඳව ද අවධානය යොමුව ඇත.