බේරුවල ප්‍රදේශයේදී පිරිසක් විසින් සිදුකළ පහරදීමකින් බේරුවල පොලිස් ස්ථානයේ අපරාධ අංශයේ ස්ථානාධිපතිවරයා ඇතුළු පොලිස් නිලධාරීන් තිදෙනෙකු තුවාල ලබා නාගොඩ රෝහලට ඇතුළත් කර ඇති බව වාර්තා වේ. මෙම සිද්ධිය සම්බන්ධයෙන් සැකකරුවන් පස් දෙනෙකු මේ වන විට අත්අඩංගුවට ගෙන ඇති බව පොලිසිය තහවුරු කරයි.
සිද්ධිය වී ඇත්තේ බේරුවල ධීවර වරාය ආසන්නයේදීය. මූලික වාර්තාවලට අනුව, ලොරි රථයක නැගී කොඩි එල්ලමින් සිටි පිරිසක් සහ රාජකාරියේ නිරතව සිටි පොලිස් නිලධාරීන් පිරිසක් අතර ඇතිවූ බහින්බස්වීමක් දුර දිග යාමෙන් පසු තත්ත්වය උණුසුම් වී මෙම පහරදීම සිදුව තිබේ.
පොලිසිය සඳහන් කළේ, කොඩි එල්ලමින් සිටි පිරිස මාර්ගය අවහිර කරමින් සිටි බවත්, මාර්ගය අවහිර නොකරන ලෙසට අදාල පිරිසට උපදෙස් දීමට පොලිස් නිලධාරීන් උත්සාහ කළ බවත්ය. එහිදී දෙපාර්ශවය අතර ඇතිවූ කතාබහක් ආරවුලක් දක්වා වර්ධනය වී ඇති අතර, පසුව සිද්ධියට සම්බන්ධ පිරිස විසින් පොලිස් නිලධාරීන්ට පහර දී ඇති බව වාර්තා වේ.
පොලිසියට පහර දුන් බව කියන මෙම පිරිස පාලනය කිරීම සඳහා, අවසානයේදී පොලිස් නිලධාරීන්ට අහසට වෙඩි තැබීමට පවා සිදුවූ බව සිද්ධිය සම්බන්ධයෙන් වැඩිදුරටත් වාර්තා වේ.
මෙවැනි ගැටුම්කාරී සිදුවීම් ප්‍රදේශයේ සාමය හා නීතියට හානි පමුණුවන අතර, රාජකාරියේ නිරත පොලිස් නිලධාරීන්ට පහරදීම බරපතල තත්ත්වයකි. තුවාල ලැබූ නිලධාරීන් රෝහලේ ප්‍රතිකාර ලබන අතර, අත්අඩංගුවට ගත් සැකකරුවන් සම්බන්ධයෙන් ඉදිරි පරීක්ෂණ කටයුතු සිදුකරන බව බේරුවල පොලිසිය වැඩිදුරටත් පවසයි.