නිරිතදිග මෝසමෙන් ඩෙංගු උණ රෝගීන් වැඩිවෙයි: මදුරු කීටයන් විනාශ කර දැමීමට ජාතික ඩෙංගු මර්දන ඒකකයෙන් දැනුම්දීමක්
නිරිතදිග මෝසම් කාලගුණයත් සමඟ මේ මස මුල සිටම ඩෙංගු රෝගීන්ගේ වැඩිවීමක් දක්නට ලැබෙන බව ජාතික ඩෙංගු මර්දන ඒකකය පවසයි. මේ තත්ත්වය සැලකිල්ලට ගෙන මදුරුවන් බෝවිය හැකි ස්ථාන විනාශ කිරීමේ වැදගත්කම ප්‍රජා වෛද්‍ය විශේෂඥ ප්‍රශීලා සමරවීර මහත්මිය අවධාරණය කරයි.
මේ වසරේ මේ දක්වා කාලය තුළ දිවයින පුරා ඩෙංගු රෝගීන් 25,259 දෙනෙකු වාර්තා වී ඇති අතර මරණ 13ක් ද සිදුවී ඇත. බස්නාහිර, සබරගමුව, නැගෙනහිර සහ දකුණු පළාත්වලින් වැඩිම රෝගීන් සංඛ්‍යාවක් වාර්තා වීම විශේෂත්වයකි.
මෙම තත්ත්වය සැලකිල්ලට ගෙන ප්‍රශීලා සමරවීර මහත්මිය වැඩිදුරටත් පවසා සිටින්නේ, ඩෙංගු මදුරුවන් බෝවීම වැළැක්වීම සඳහා ජනතාවගේ සහය අත්‍යවශ්‍ය බවයි. ඒ අනුව, ඔබගේ නිවසේ සහ අවට පරිසරයේ මදුරුවන් බෝවිය හැකි ස්ථාන හඳුනාගෙන ඒවා විනාශ කිරීමට කටයුතු කිරීමෙන් ඩෙංගු රෝගය පැතිරීම පාලනය කිරීමට හැකි බව ඇය පෙන්වා දෙයි.
පොල් කටු, ටයර්, මල් පෝච්චි, කාණු සහ වහලවල සිරවී ඇති ජලය මදුරුවන් බෝවීමට සුදුසු ස්ථාන වේ. එම නිසා, නිතිපතා මෙම ස්ථාන පිරිසිදු කිරීමෙන් මදුරුවන් බෝවීම වළක්වා ගත හැකිය.
මීට අමතරව, නිවසේ ජනෙල් සහ දොරවල්වලට දැල් සවි කිරීමෙන් මදුරුවන්ගේ ග්‍රහණයෙන් ආරක්ෂා විය හැකි අතර, රාත්‍රී කාලයේදී මදුරු දැල් භාවිතා කිරීමෙන් ද ඩෙංගු මදුරුවන්ගෙන් ආරක්ෂා වීමට පුළුවන.
ඩෙංගු රෝග ලක්ෂණ හඳුනා ගැනීමත් ඉතා වැදගත් වේ. උණ, හිසරදය, ඇස් යට වේදනාව, මාංශ පේශි වේදනාව සහ සමේ රතු ලප ඇතිවීම ඩෙංගු රෝගයේ ප්‍රධාන ලක්ෂණ වේ. මෙම රෝග ලක්ෂණ ඇත්නම් වහාම වෛද්‍ය ප්‍රතිකාර ලබා ගැනීමෙන් රෝගය උත්සන්න වීම වළක්වා ගත හැකිය.
ඩෙංගු මර්දන වැඩසටහන් සඳහා සහයෝගය ලබාදීමෙන් සහ නිවසේ මදුරුවන් බෝවිය හැකි ස්ථාන විනාශ කිරීමෙන් ඩෙංගු රෝගයෙන් ආරක්ෂා වීමට සියලුම පුරවැසියන්ගේ සහයෝගය අත්‍යවශ්‍ය වේ.
ඩෙංගු රෝගය පාලනය කිරීම සඳහා ජාතික ඩෙංගු මර්දන ඒකකය දිගින් දිගටම විවිධ වැඩසටහන් ක්‍රියාත්මක කරනු ලබන අතර, මේ සඳහා ජනතාවගේ සහයෝගය අත්‍යවශ්‍ය බව නැවත වරක් අවධාරණය කර සිටිමු.
සටහන: ජනක තරංග හේවාසූර විසිනි