කොම්පඤ්ඤ වීදිය පොලිස් ස්ථානයෙන් වාර්තා වන පරිදි, පසුගිය 2025 ජූලි 27 වන දින දහවල් කාලයේ මෝගන් පාර ප්‍රදේශයේදී ලද තොරතුරක් මත සිදුකළ වැටලීමකදී නීති විරෝධී ලෙස මෙරටට ගෙන ආ දුම්වැටි 40,000 ක් සමඟ 47 හැවිරිදි කොළඹ 12 ප්‍රදේශයේ පදිංචිකරුවෙකු අත්අඩංගුවට ගෙන තිබේ. පසුව, සැකකරුගෙන් සිදුකළ වැඩිදුර විමර්ශනවලින් අනාවරණය වූ තොරතුරු මත එදිනම සවස් කාලයේ එම ප්‍රදේශයේදීම තවත් වැටලීමක් සිදුකර නීති විරෝධී දුම්වැටි 40,000 ක් සමඟ 56 හැවිරිදි දෙහිවල ප්‍රදේශයේ පදිංචිකරුවෙකුද අත්අඩංගුවට ගැනීමට පොලීසිය සමත් වී ඇත. අත්අඩංගුවට ගත් මුළු දුම්වැටි ප්‍රමාණය 80,000 කි.
මේ අතර, ජා-ඇල පොලිස් ස්ථානයට ලද තොරතුරක් මත පසුගිය 27 වනදා උදෑසන හල්ලක්කඩ වත්තග්‍රේලයින් වගුරු බිමේදී සිදුකළ වැටලීමකින් නීති විරෝධී මත්පැන් පෙරීමට යොදා ගන්නා ලද ගෝඩා ලීටර් 5859 ක් (බැරල් 31 ක්) සමඟ 51 හැවිරිදි ඒකල ප්‍රදේශයේ පදිංචිකරුවෙකු අත්අඩංගුවට ගෙන ඇත.
එමෙන්ම, බිබිල පොලිස් ස්ථානයට ලද තොරතුරකට අනුව 2025 ජූලි 27 වන දින දහවල් කාලයේ උස්සාගල ප්‍රදේශයේදී මෙරට නිෂ්පාදිත ගිනි අවියක් සමඟ 45 හැවිරිදි උස්සාගල, බිබිල ප්‍රදේශයේ පදිංචිකරුවෙකු අත්අඩංගුවට ගැනීමට බිබිල පොලීසිය සමත් වී තිබේ.
මෙම සිද්ධීන් සම්බන්ධයෙන් අදාළ පොලිස් ස්ථාන මගින් වැඩිදුර විමර්ශන සිදුකරනු ලබයි. නීතිය හා සාමය ආරක්ෂා කිරීම වෙනුවෙන් පොලීසිය සිදුකරන මෙවැනි මෙහෙයුම් අඛණ්ඩව ක්‍රියාත්මක බව වාර්තා වේ.