රත්නපුර කොට්ඨාස අපරාධ විමර්ශන අංශයේ මෙහෙයුමකින් අයිස් මත්ද්‍රව්‍ය සමග සැකකරුවෙකු රක්වානෙන් අත්අඩංගුවට
රත්නපුර කොට්ඨාස අපරාධ විමර්ශන අංශයේ නිලධාරීන් විසින් රක්වාන පොලිස් වසමට අයත් ගලහිටිය ප්‍රදේශයේදී ඊයේ (2025 මැයි 30) සිදු කළ හදිසි වැටලීමකදී අයිස් මත්ද්‍රව්‍ය ග්‍රෑම් 31යි මිලි ග්‍රෑම් 100ක් සන්තකයේ තබාගෙන සිටි පුද්ගලයෙකු අත්අඩංගුවට ගැනීමට හැකි වී තිබේ.
මෙම වැටලීම රත්නපුර කොට්ඨාස අපරාධ විමර්ශන කාර්යංශයේ නිලධාරීන් කණ්ඩායමක් විසින් සිදු කර ඇති අතර, එහිදී සැකකරු සන්තකයේ තිබී ජංගම දුරකථන දෙකක්ද සොයාගෙන ඇත. අත්අඩංගුවට ගත් සැකකරු වැඩිදුර විමර්ශන කටයුතු සඳහා රත්නපුර පොලිස් ස්ථානය වෙත භාර දී ඇත.
අත්අඩංගුවට ගත් සැකකරු වයස අවුරුදු 33ක් වන ගොඩකවෙල ප්‍රදේශයේ පදිංචිකරුවෙකි. සිද්ධිය සම්බන්ධයෙන් රත්නපුර පොලිසිය විසින් පුළුල් විමර්ශනයක් ආරම්භ කර ඇති අතර, මෙම ජාවාරමට සම්බන්ධ අනෙකුත් පුද්ගලයින් සොයා ගැනීමටද පරීක්ෂණ ක්‍රියාත්මක වේ.
රත්නපුර කොට්ඨාසයේ අපරාධ මර්දනය කිරීම සඳහා පොලිසිය නිරන්තරයෙන් මෙහෙයුම් ක්‍රියාත්මක කරන අතර, මත්ද්‍රව්‍ය ජාවාරම්කරුවන් සහ නීතිවිරෝධී ක්‍රියාවල නිරත වන පුද්ගලයින් අත්අඩංගුවට ගැනීම සඳහා විශේෂ වැඩපිළිවෙලක් දියත් කර ඇත. මෙම වැටලීමද එහි එක් කොටසක් ලෙස සැලකිය හැකිය.
මෙම සිද්ධිය සම්බන්ධයෙන් රත්නපුර පොලිසිය වැඩිදුර විමර්ශන සිදු කරනු ලබන අතර, ඉදිරියේදී මෙවැනි වැටලීම් තවදුරටත් ක්‍රියාත්මක කිරීමට නියමිත බව පොලිස් ආරංචි මාර්ග පවසයි.